Pilots

Renewing tradition

Bidh Fèisean nan Gàidheal a’ stiùireadh pròiseact-deuchainne a bhios a’ cur feum air Amplify Portable gus ceòl traidiseanta, òrain Ghàidhlig agus cleasachd a theagasg do dhaoine òga air feadh Alba.

Stiùiriche na deuchainne

Fèisean nan Gàidheal

Càite?

Alba

Làrach-lìn

www.feisean.org

Teicneòlas fo dheuchainn

AMPLIFY PORTABLE

Bidh Amplify Portable furasta a chleachdadh agus saor. Leigidh e le luchd-ciùil (gu h-àraidh luchd-ciùil òga) ionnsachadh, cluiche agus seinn le chèile, agus a dhol an sàs ann an ceòl agus dràma gu proifeiseanta no mar chur-seachad, ges bith càit a bheil iad.

Tuairisgeul na deuchainne

Nì oidean 6 seiseanan, le mu 10 neach-ciùil òg bho mu 20 Fèis a’ dol an sàs anns gach seisean, anns a’ chiad roinn de dheuchainnean. Bidh an teicneòlas fo dheuchainn ann an teagasg 1-ri-1, ann an clasaichean na bu mhotha, agus ann an obair-bhuidhne le luchd-ciùil a’ cluich beò le chèile.

Is i prìomh obair Fèisean nan Gàidheal a bhith a’ cumail taic ri Fèisean ionadail ann an 47 sgìrean air feadh na dùthcha, far am faigh clann agus daoine òga oideachadh ann an ceòl traidiseanta gu cunbhalach. Tha Fèisean nan Gàidheal cuideachd a’ teagasg ceòl agus Gàidhlig tro sgoiltean, agus mar sin thathas a’ ruighinn còrr is 300 coimhearsnachd Gàidhealach.

Tha tòrr den obair seo ga dèanamh ann an sgìrean dùthchail far a bheil oidean gann agus cosgaisean siubhail- a thaobh airgid is àrainneachd- na chnap-starra. Bidh AMPLIFY a’ lorg fuasgladh do na dùbhlain sin tro theicneòlas a bhios a’ cur feum air tuigse fuadain (AI) agus ag amas air daoine a thoirt cruinn còmhla ann an àrainneachd dhidseatach, ach an tèid airgead a chosg air taic a chumail ri luchd-ealain agus air foghlam nan daoine òga, seach siubhal.

Ar n-amas

Bheir AMPLIFY cothrom do dh’Fhèisean nan Gàidheal:

Rannsachadh a dhèanamh air mar a ghabhas cnapan-starra a lùghdachadh ach am faigh daoine òg à sgìrean dùthchail an t-aon chothrom air oideachadh cunbhalach ann an ceòl traidiseanta
Deuchainnean a dhèanamh air mar a ghabhas dèiligeadh ris a’ bhuaidh a th’ aig iomallachd air tar-chur cultair, mar a ghabhas coimhearsnachdan agus cultar Gàidhealach a neartachadh, agus mar a ghabhas an truailleachd a tha an lùib teagasg ann an sgìrean dùthchail a lùghdachadh
Luchd-ealain à àitichean eadar-dhealaichte a thoirt cruinn, a dh’ullachadh airson cuirm-chiùil gun chosgais gualain no ionmhasail
Tachartas a chur air dòigh, le luchd-ealain às a’ Ghàidhealtachd a’ cluich le feadhainn thall thairis, aig an fhèis chiùil Blas. Mar seo, thèid co-obrachadh a bhrosnachadh agus dàimh a thogail eadar luchd-ealain agus luchd-èisteachd air a’ Ghàidhealtachd agus ann an dùthchannan eile aig a bheil dualchas Gàidhealach
An cuid dhòighean is ghnìomhean atharrachadh a-rèir na thèid ionnsachadh tro AMPLIFY

Dùbhlain

B’ fheudar do dh’Fhèisean nan Gàidheal feum a chur air na h-innealan a bh’ ann mar-thà nuair a ghluais iad gu teagasg air-loidhne ri linn a’ ghlasaidh-sluaighe, a leithid Zoom, is iad ag amas air cothrom a thoirt do dhaoine òga a bhith a’ cruinneachadh fhathast is càirdeas a bhrosnachadh. Chaidh tòrr ionnsachadh mu na cothroman, a bharrachd air cnappan-starra, an lùib teagasg air-loidhne. Bha cuid de na dùbhlain farsaing (a leithid eadar-lìon nas slaodaiche ann an sgìrean dùthchail), ach bha cuid eile a’ toirt buaidh mhòr air ceòl gu sònraichte, a leithid dàil no stadadh sa cheangal, mùchadh fuaime (a tha feumail ann an co-labhairt ach gun fheum ann an cèilidh). Cha deach fuasgladh a lorg do na dùbhlain sin fhathast, ach tha e comasach ceumannan a ghabhail, an dà chuid anns an teicneòlas fhèin agus mar a thèid a chur gu feum. ’S e seo a tha fa-near dhuinn tro phròiseact-deuchainne AMPLIFY ann an Alba, le bhith a’ freagairt na ceist: Dè mar a ghabhas teicneòlas didseatach a chur gu feum gus luchd-ealain à sgìrean dùthchail a thoirt cruinn, a dh’ionnsachadh agus a chluich le chèile beò?

Am fuasgladh teicneòlach

Dh’fhaodadh e oileanaich a tha ag ionnsachadh na pìoba ann an Uibhist a Deas a cheangal ri oide anns a’ Ghearrasdan no Glaschu nuair a tha feum air, air a no luchd-ciùil proifeiseanta air a’ Ghàidhealtachd a cheangal ri feadhainn ann an Ceap Breatainn (far a bheil dualchas làidir, Gàidhealach) no Èirinn.

Bidh AMPLIFY a cheart cho furasta a chleachdadh Zoom no Skype, ach na b’ fheàrr a thaobh fuaim agus feum sònraichte nam Fèisean (le tuigse-fuadain (AI) a’ dearbhadh gu bheil am fuaim agus bhidio air a mheasgachadh aig sàr àrd-ìre). Bidh seo fìor ged a bhiodh daoine cruinn ann an aon seòmar no ann an seòmraichean fa-leth, a’ cur feum air aon chompiutair no fòn air a no iomadach inneal.

Bidh co-obrachadh air a dhèanamh na b’ fhasa tro innleachdan ùra, a leithid comas a bhith a’ clàradh agus ag èisteachd air ais anns a’ bhad, a leigeil le com-pàirtichean a bhith a’ cluinntinn na chluich iad, a’ faighinn stiùireadh, agus a’ dèanamh adhartas. Bidh e cuideachd furasta do dh’oidean leasanan-buidhne a stiùireadh, le ceòl bho iomadach oileanach ga cho-thìmeachadh, agus comas fòcas a chur air aon oileanach ged a bhiodh a’ bhuidheann gu leìr a’ cluich. Tha e na amas dhuinn gum bi e comasach do dhaoine a bhith a’ cluich còmhla, agus mar sin nì sinn ar dìcheall dàil agus stadadh-fuaime a lùghdachadh, ged nach bi seo gu tur an urra rinne, ach ri ceangal ris an eadar-lìon cuideachd. Nithear rannsachadh air modhan eadar-dhealaichte a dh’fhaodte a chur an gnìomh aig amannan nuair a bhios an dàil ro mhòr, a dhearbhadh gum b’ urrainnear fhathast cruinneachadh agus co-obrachadh (le bhith a’ clàradh earrann, ga roinn le càirdean agus a’ cluich ris, le chèile).

Fèis: far am bi ginealaichean a’ tighinn còmhla a dhèanamh gàirdeachas air an cuid chultair Gàidhealaich, tro cheòl, òrain, agus cleasachd- a’ beathachadh cruthalachd, a’ glèidheadh dualchas, agus a’ brosnachadh dhaoine òga a dhol an sàs anns na h-ealain agus nan cultar.

Buaidh

Bheir AMPLIFY daoine bho choimhearsnachdan eadar-dhealaichte còmhla, aig tachartasan agus tro ghnìomhan cultarail beò (no le bhith a’ cur feum air innleachdan ùra aig amannan nuair a tha dàil sa cheangal gus fuasgladh a lorg). Dh’fhaodadh am pròiseact lùghdachadh a dhèanamh air na thathas a’ cosg de dh’airgead agus de chonnadh, agus mar sin tuilleadh maoineachaidh a chosg air tachartasan agus foghlam cultarail. Gu dearbha, tha sinn an-còmhnaidh ag amas air seasmhachd, a thaobh ionmhais agus àrainneachd. Ma thèid leinn, bidh e comasach dhuinn am modh-ionnsachaidh agus cluiche seo a chur an gnìomh fad bhliadhnaichean ri thighinn, a’ dearbhadh gum bi cothroman cultarail ri fhaotainn do luchd-ciùil agus luchd-èisteachd na b’ fharsainge gu cunbhalach, a dh’aindeoin ’s càit a bheil iad san dùthaich. Bidh cothrom ann ceanglaichean na bu làidire a thogail le coimhearsnachdan Gàidhealach ann an àitichean a leithid Èirinn, Eilean Mhanainn agus Alba Nuadh cuideachd, a bharrachd air coimhearsnachdan eile far a bheileas a’ bruidhinn mion-chànan, a leithid Geàrnsaidh, Deàrsaidh no a’ Bhreatann Bheag.

Gnìomhan air thoiseach oirnn

Bithear ag ullachadh dheuchainnean de dh’AMPLIFY PORTABLE aig toiseach 2025, le teagasg air-loidhne a’ tòiseachadh bhon Ghiblean.